Психолошките ефекти и реакции на абортусот варираат од една до друга жена и ситуација. Некои жени зборуваат за едно чувство на големо олеснување и ослободување по направениот абортус, и тоа е нормално и е во ред.
Кога бременоста не е планирана, можеби е во прерана или предоцна ризична возраст или е непосакувана од многу други различни причини, некогаш абортусот е најдобрата опција за жената. Ослободувачко чувство се јавува и во ситуации кога здравјето на жената е во ризик од бременоста која настанала.
Но, прашањето кое е побитно е кои се негативните емоционални и психолошки ризици по превземањето на ваков чекор?
Емоционалните и психолошките ефекти по абортусот се многу почести и покарактеристично е нивното појавување во однос на физичките промени. Психолошките реакции на жената можат да бидат од благо каење па се до посериозна состојба на депресија. Многу е битно да се зборува за овој чекор уште пред неговото превземање со стручно лице, со чија помош може да се разгледаат сите опции, грижи и да се најде одговорот на сите прашања.
Како листа на можни негативни психолошки појави кои најчесто се јавуваат, и чие траење, интензитет и предиспонираност се различни кај секоја жена се:
- каење
- срам
- бес и лутина
- чувство на вина
- чувство на осаменост и изолација
- намалена самодоверба
- несоница или кошмарни сонови
- нарушување и конфликт во партнерскиот однос
- нарушување на апетитот и исхраната
- анксиозност
- депресивност
- суицидални мисли и чувства.
Секоја жена може да ги доживее овие неочекувани негативни состојби и чувства како резултат на абортус. Најчесто самата процедура ги афектира емотивно повеќе од колку што очекувале да ги допре.
Зголемен е ризикот да се појават негативните психолошки состојби кај жената во неколку случаи, а тие се:
- кај индивидуи со претходни негативни емотивни и психолошки состојби, растројства или психијатриски болести
- индивидуи кои се принудени да ја извршат процедурата, против својата сопствена волја
- индивидуи кои имаат конфликт со нивните религиозни убедувања и абортусот
- индивидуи кои имаат морални и етички конфликти со постапката на абортирање и изборот за тоа
- индивидуи кои треба да извршат абортус во поодмината фаза на бременоста
- индивидуи кои мора да минат низ постапката без подршка и знаење од нивниот партнер или пак семејство
- индивидуи кај кои мора да се изврши абортус бидејќи постојат одредени генетски или фетални аномалии.
Што се препорачува кај жени кои планираат да направат абортус?
Да побараат стручна психолошка помош и советување и да се дискутира за сите околности, чувства, размислувања, стравови, двоумења, да се одговорат сите прашања.
Жената да не се изолира во периодот кога ќе се појави непланираната бременост, и да пробува сама да мине низ ситуацијата. Да ги вклучи партнерот и најблиските за комуникација и подршка, која во ваков период и е многу потребна. Изолацијата е таа која може да води кон депресија.
Да се избегнуваат луѓе кои ве советуваат и ве тераат да го направите изборот кои тие мислат дека е најдобар. Вие избирате, ваша е одлуката и земете си време да си размислите и да си одлучите кое е најдоброто решение за вас.
Добро е во некои ситуации ако може да најдете некој кој минал низ ова искуство и да разговарате со него, така ќе се доближи целата постапка и ситуација и ќе бидете поинформирани и свесни за сите избори кои ги имате, а ги имате секогаш!
Ако имате некои од негативните чувства по абортусот, или едноставно имате потреба од разговор, слободно обратете се веднаш до нашето здружение.
Ивана Хаџиванова - Психолог/Психотерапевт
